|
O NOVO SEMINARIO DE ESTUDOS GALEGOS O 12 de outubro de 1923 nove estudiantes universitarios fundaron en Santiago de Compostela o Seminario de Estudos Galegos: unha institución ligada á Universidade compostelá na que confluíron profesores e alumnos universitarios, os homes máis sobranceiros do movemento galeguista e gran parte dos membros dos cenáculos eruditos de Galicia. Nos seus doce anos de vida activa (1923-1936), o Seminario, estructurado en doce seccións, abordará case tódalas manifestacións da cultura galega, atenderá á formación de investigadores e á divulgación científica, e introducirá un novo método de traballo, en equipos interdisciplinares, moi en voga nas Universidades europeas e nas mellores e máis avanzadas institucións educativas e culturais españolas da época. O Seminario de Estudos Galegos constituiu, sen dúbida, unha das empresas científicas máis sobranceiras da Galicia do século XX. | |
 | ||